ഒരു പഴയ കാര് ഗതാഗതയോഗ്യമല്ലാതാകുമ്പോഴോ സര്ക്കാര് നിയന്ത്രണങ്ങള് അനുസരിച്ച് അതിന്റെ ആയുസ്സ് അവസാനിച്ചാലോ അത് സ്ക്രാപ്പ് ചെയ്യുന്നു. നിങ്ങളുടെ പ്രിയപ്പെട്ട കാര് ഒരു സ്ക്രാപ്പിംഗ് സെന്ററിലേക്ക് കൊണ്ടുപോയതിനുശേഷം അതിന് എന്ത് സംഭവിക്കുമെന്ന് എപ്പോഴെങ്കിലും ചിന്തിച്ചിട്ടുണ്ടോ?.
ആദ്യം കാറിനുള്ളിലുള്ള എല്ലാ എണ്ണകളും ദ്രാവകങ്ങളും വറ്റിക്കുന്നു. ഇതില് പെട്രോള് അല്ലെങ്കില് ഡീസല്, എഞ്ചിന് ഓയില്, ബ്രേക്ക് ഓയില്, കൂളന്റ്, എസി ഗ്യാസ് എന്നിവയെല്ലാം ഉള്പ്പെടുന്നു. ഇവ നീക്കം ചെയ്തില്ലെങ്കില് പൊളിക്കുമ്പോള് തീപിടുത്തമുണ്ടാകാനുള്ള സാധ്യതയുണ്ട്. മാത്രമല്ല അവ പരിസ്ഥിതിക്കും ദോഷം ചെയ്യും. ഇത്തരത്തില് മാറ്റുന്ന എല്ലാ രാസവസ്തുക്കളും സുരക്ഷിതമായി പുനരുപയോഗം ചെയ്യുന്നു.
അടുത്തതായി കാറിന്റെ ഭാഗങ്ങള് ഓരോന്നായി പൊളിച്ചുമാറ്റേണ്ട സമയമാണ്. മെക്കാനിക്കുകള് കാറിന്റെ ബാറ്ററി, സിഎന്ജി സിലിണ്ടര്, ടയറുകള് ഇവയെല്ലാം നീക്കം ചെയ്യുന്നു. അടുത്തതായി സീറ്റുകള്, സ്റ്റിയറിംഗ്, മ്യൂസിക് സിസ്റ്റം, വിലയേറിയ ലോഹ കാറ്റലറ്റിക് കണ്വെര്ട്ടര്, ഹെഡ്ലൈറ്റുകള് തുടങ്ങിയ കാറിന്റെ ഉള്ഭാഗങ്ങള് പൊളിച്ചുമാറ്റുന്നു.
ഇവയൊക്കെ നല്ല ഭാഗങ്ങളാണെങ്കില് പുനരുപയോഗത്തിനായി വില്ക്കുന്നു. കാറിന്റെ ഏറ്റവും പ്രധാനപ്പെട്ട ഭാഗങ്ങള് അതിന്റെ എഞ്ചിനും ഗിയര്ബോക്സുമാണ്. ക്രെയിനുകളും കട്ടറുകളും ഉപയോഗിച്ച് എഞ്ചിന് കാറില് നിന്ന് വേര്തിരിക്കുന്നു. എഞ്ചിനില് വലിയ അളവില് അലുമിനിയം, ഇരുമ്പ്, ചെമ്പ് എന്നിവ അടങ്ങിയിരിക്കുന്നു. പുതിയ ലോഹം ഉത്പാദിപ്പിക്കാന് ഈ മെറ്റീരിയല് ഉരുക്കുന്നതിനായി ഫാക്ടറികളിലേക്ക് അയയ്ക്കുന്നു.
ഒരു കാറില് നിന്ന് റബ്ബര്, പ്ലാസ്റ്റിക്, ഗ്ലാസ്, എഞ്ചിന് ഭാഗങ്ങള് ഇവയെല്ലാം നീക്കം ചെയ്യുമ്പോള് ഒരു പൊള്ളയായ ഇരുമ്പ് ഫ്രെയിം മാത്രമേ അവശേഷിക്കൂ. ഈ ഫ്രെയിം പിന്നീട് ഒരു വലിയ ഹൈഡ്രോളിക് കംപ്രസ്സറിലേക്ക് തിരുകുന്നു. മിന്നല് വേഗത്തില് ഹൈഡ്രോളിക് കംപ്രസ്സര് മുഴുവന് കാര് ബോഡിയും ഒരു ചെറിയ കഷണമോ ഇരുമ്പ് ബ്ലോക്കോ ആക്കി ചുരുക്കുന്നു. ഈ ഇരുമ്പ് ബ്ലോക്ക് പിന്നീട് വലിയ ചൂളകളില് എത്തിച്ച് ഉരുക്കുന്നു.
ഇങ്ങനെ ഉരുക്കിയ ഇരുമ്പ് പിന്നീട് പുതിയ സ്റ്റീല് ഷീറ്റുകള് നിര്മ്മിക്കാന് ഉപയോഗിക്കുന്നു. ഇങ്ങനെ പുനരുപയോഗം ചെയ്ത ഇരുമ്പ് പിന്നീട് പുതിയ കാറുകള്, പാലങ്ങള്, ട്രെയിന് ട്രാക്കുകള് എന്നിവ നിര്മ്മിക്കാന് വീണ്ടും ഉപയോഗിക്കുകയാണ് ചെയ്യുന്നത്.