മദ്യപിച്ചതിൻ്റെ അടുത്ത ദിവസം രാവിലെ വാഹനം ഓടിച്ച് പോയാലും ഇനി സൂക്ഷിക്കണം. എംവിഡി പരിശോധിക്കുമ്പോൾ രക്തത്തിൽ മദ്യത്തിൻ്റെ അളവ് അൻപത് മില്ലിക്ക് മുകളിലാണെങ്കിൽ ഉറപ്പായും വണ്ടിയോടിച്ചയാളുടെ ലൈസൻസ് റദ്ദാക്കുമെന്നാണ് എംവിഡിയുടെ തീരുമാനം.
കൊച്ചിയിൽ 1121 പേരുടെ ലൈസൻസുകളാണ് ഇത്തരം നിയമലംഘനങ്ങളുൾപ്പെടെ കണക്കിലെടുത്ത് ആർടിഒ റദ്ദാക്കിയിരിക്കുന്നത്. കേസുകളുടെ എണ്ണം കൂടിയതോടെ എറണാകുളം ആർടിഒ കെ ആർ സുരേഷ്, ജോയിൻ്റ് ആർടിഒ സിഡി അരുൺ എന്നിവർ ചേർന്നാണ് ഹിയറിങ് നടപടികൾ ദ്രുതഗതിയിലാക്കി കേസുകൾ തീർപ്പാക്കുന്നത്.
ഈ വർഷം മാത്രം മദ്യപിച്ച് വാഹമോടിച്ചതിന്റെ പേരിൽ 437 പേരുടെ ലൈസൻസുകൾ റദ്ദാക്കിയിട്ടുണ്ടെന്ന് എംവിഡി അറിയിച്ചു. ഇതിലധികരും ബസ്, കാർ, ലോറി ഡ്രൈവർമാരാണ്.