അമിതവണ്ണം കുറയ്ക്കാനും ടൈപ്പ് 2 പ്രമേഹം നിയന്ത്രിക്കാനുമുള്ള യു.എസ്. ഫാർമസ്യൂട്ടിക്കൽ കമ്പനിയായ ‘എലി ലില്ലി’യുടെ പ്രശസ്തമായ മരുന്ന് ‘മൗൻജാരോ’ (ടിർസെപാറ്റിഡ്) ഇന്ത്യയിൽ പുറത്തിറക്കി. സെൻട്രൽ ഡ്രഗ്‌സ് സ്റ്റാൻഡേർഡ് കൺട്രോൾ ഓർഗനൈസേഷൻ്റെ അംഗീകാരം ലഭിച്ചതിന് പിന്നാലെയാണ് എലി ലില്ലി ‘മൗൻജാരോ’ ഇൻജക്ഷൻ ഇന്ത്യയിൽ അവതരിപ്പിച്ചത്.
ഡോക്ടറുടെ നിർദേശപ്രകാരം ആഴ്ചയിലൊരിക്കലാണ് മൗൻജാരോ ഇൻജക്ഷൻ എടുക്കേണ്ടത്. 5 മില്ലിഗ്രാം വയാലും 2.5 മില്ലിഗ്രാം വയാലുമാണ് ഇന്ത്യയിൽ കമ്പനി പുറത്തിറക്കിയിരിക്കുന്നത്. 5 മില്ലിഗ്രാം വയാലിന് 4,375 രൂപയാണ് വില. 2.5 മില്ലിഗ്രാം വയാലിന് 3,500 രൂപയും.
നാച്യുറൽ ഇൻക്രെറ്റിൻ ഹോർമോണുകളായ ജിഐപി, ജിഎൽപി-1 എന്നിവയെ ആക്ടിവേറ്റ് ചെയ്യുകയാണ് ‘മൗൻജാരോ’ ഇൻജക്ഷൻ ചെയ്യുന്നത്. ഇത് ഡോക്ടറുടെ കുറിപ്പടിപ്രകാരം മാത്രം ഉപയോഗിക്കേണ്ട മരുന്നാണ്. യു.കെ.യിലും യൂറോപ്യൻ രാജ്യങ്ങളിലും ‘മൗൻജാരോ’ എന്ന ബ്രാൻഡിൽ തന്നെയാണ് എലി ലില്ലി ഈ മരുന്ന് വിൽക്കുന്നത്. യു.എസിൽ ‘സെപ്ബൗണ്ട്’ എന്നപേരിലും ഇതേ ഇൻജക്ഷൻ വിൽക്കുന്നുണ്ട്.
അതേസമയം, ‘മൗൻജാരോ’യ്ക്ക് ഇന്ത്യൻ വിപണയിൽ പ്രഖ്യാപിച്ച വില കൂടുതലാണെന്നാണ് വിദഗ്‌ധരുടെ അഭിപ്രായം. ഈ വിലയാണെങ്കിൽ ഒരുവർഷം ലക്ഷക്കണക്കിന് രൂപ ഒരു രോഗി മരുന്നിനായി ചെലവഴിക്കേണ്ടിവരുമെന്നും വിദഗ്‌ധർ അഭിപ്രായപ്പെടുന്നു.