കോള്‍ വിളിക്കാനും മെസേജ് അയയ്ക്കാനും മാത്രമല്ല വീഡിയോ കാണാനും ഗെയിം കളിക്കാനും ഫോട്ടോ എടുക്കാനും ബാങ്കുമായി ബന്ധപ്പെട്ട കാര്യങ്ങള്‍ ചെയ്യാനും എല്ലാം ഇന്ന് ഫോണ്‍ തന്നെയാണ് എല്ലാവരും ഉപയോഗിക്കുന്നത്. അതുകൊണ്ടുതന്നെ ഫോണ്‍ ഇടയ്ക്കിടെ ചൂടാകുന്നത് പലരെയും ആശങ്കപ്പെടുത്താറുണ്ട്.
ചാര്‍ജിലിരിക്കുമ്പോഴും ഗെയിം കളിക്കുമ്പോഴും വീഡിയോ റെക്കോര്‍ഡ് ചെയ്യുമ്പോഴും ഫോണ്‍ ചൂടാകുന്നത് സാധാരണയായി സംഭവിക്കുന്ന കാര്യമാണ്. എന്നാല്‍ വലിയ ഉപയോഗമൊന്നുമില്ലാതെ ഫോണ്‍ പതിവായി അമിതമായി ചൂടാകുന്നുണ്ടെങ്കില്‍ ചില സെറ്റിംഗുകള്‍ പരിശോധിക്കുന്നത് നല്ലതാണ്.
സ്‌ക്രീന്‍ ബ്രൈറ്റ്‌നസ് എപ്പോഴും പരമാവധിയാക്കി വെക്കരുത്
ഫോണിന്റെ സ്‌ക്രീന്‍ ബ്രൈറ്റ്‌നസ് വളരെ കൂടുതലായി വെച്ചാല്‍ വൈദ്യുതി ഉപയോഗം കൂടും. പ്രത്യേകിച്ച് ഏറെ നേരം ഉയര്‍ന്ന ബ്രൈറ്റ്‌നസില്‍ ഫോണ്‍ ഉപയോഗിക്കുന്നത് ചൂട് കൂടാന്‍ കാരണമാകാം. അതുകൊണ്ട് ആവശ്യമില്ലാത്തപ്പോള്‍ ബ്രൈറ്റ്‌നസ് കുറയ്ക്കുക. ഫോണില്‍ Auto Brightness അല്ലെങ്കില്‍ Adaptive Brightness സൗകര്യമുണ്ടെങ്കില്‍ അത് ഉപയോഗിക്കാം. ചുറ്റുപാടിലെ വെളിച്ചത്തിനനുസരിച്ച് സ്‌ക്രീന്‍ ബ്രൈറ്റ്‌നസ് സ്വയം ക്രമീകരിക്കാന്‍ ഇത് സഹായിക്കും.
ആവശ്യമില്ലാത്ത ആപ്പുകള്‍ പിന്നില്‍ പ്രവര്‍ത്തിക്കാന്‍ അനുവദിക്കരുത്
നമ്മള്‍ ഒരു ആപ്പ് തുറന്ന് ഉപയോഗിച്ച ശേഷം മറ്റൊരു ആപ്പിലേക്ക് മാറിയാലും ചില ആപ്പുകള്‍ പിന്നില്‍ പ്രവര്‍ത്തിച്ചുകൊണ്ടിരിക്കാം. ഡാറ്റ സിങ്ക് ചെയ്യുക, ലൊക്കേഷന്‍ പരിശോധിക്കുക തുടങ്ങിയ പ്രവര്‍ത്തനങ്ങള്‍ നടക്കുമ്പോള്‍ ബാറ്ററി ഉപയോഗവും കൂടാം. Settings – Battery – Battery Usage എന്ന ഭാഗത്ത് പോയി ഏതൊക്കെ ആപ്പുകളാണ് കൂടുതല്‍ ബാറ്ററി ഉപയോഗിക്കുന്നതെന്ന് പരിശോധിക്കാം. ആവശ്യമില്ലാത്ത ആപ്പുകളുടെ background activity നിയന്ത്രിക്കുന്നത് സഹായകരമാണ്.
എന്നാല്‍ എല്ലാ ആപ്പുകളുടെയും background activity ഒരുപോലെ ഓഫ് ചെയ്യേണ്ടതില്ല. ഇ-മെയില്‍, ക്ലൗഡ് ബാക്കപ്പ് തുടങ്ങിയ ചില ആപ്പുകള്‍ക്ക് പിന്നില്‍ പ്രവര്‍ത്തനം ആവശ്യമായിരിക്കാം.
എല്ലാ ആപ്പുകള്‍ക്കും ലൊക്കേഷന്‍ അനുമതി നല്‍കേണ്ടതില്ല. Maps പോലുള്ള ആപ്പുകള്‍ക്ക് ലൊക്കേഷന്‍ ആവശ്യമാണ്. എന്നാല്‍ ഉപയോഗിക്കാത്ത പല ആപ്പുകള്‍ക്കും എല്ലായ്‌പ്പോഴും ലൊക്കേഷന്‍ ആക്‌സസ് അനുവദിക്കേണ്ട ആവശ്യമില്ല.
Settings – Location – App permissions എന്ന ഭാഗത്ത് പോയി ഏത് ആപ്പുകള്‍ക്കാണ് ലൊക്കേഷന്‍ അനുമതി നല്‍കിയിരിക്കുന്നതെന്ന് പരിശോധിക്കാം. ആവശ്യമില്ലാത്ത ആപ്പുകള്‍ക്ക് ‘Allow only while using the app’ പോലുള്ള ഓപ്ഷന്‍ തിരഞ്ഞെടുക്കുന്നത് കൂടുതല്‍ നിയന്ത്രണം നല്‍കും. GPS, ലൊക്കേഷന്‍ സേവനങ്ങള്‍ എന്നിവ തുടര്‍ച്ചയായി ഉപയോഗിക്കുന്നത് ബാറ്ററി ഉപഭോഗം വര്‍ധിപ്പിക്കാം.
ആവശ്യമില്ലാത്ത നോട്ടിഫിക്കേഷനുകള്‍ ഓഫ് ചെയ്യാം
ഓരോ ആപ്പില്‍ നിന്നുമുള്ള നോട്ടിഫിക്കേഷന്‍ ആവശ്യമില്ല. നിരന്തരം വരുന്ന നോട്ടിഫിക്കേഷനുകള്‍ സ്‌ക്രീന്‍ വീണ്ടും വീണ്ടും തെളിയാനും ചില background പ്രവര്‍ത്തനങ്ങള്‍ നടക്കാനും കാരണമാകാം.സോഷ്യല്‍ മീഡിയ, ഷോപ്പിങ് തുടങ്ങിയ ആപ്പുകളില്‍ ആവശ്യപ്പെടാത്ത നോട്ടിഫിക്കേഷനുകള്‍ ഓഫ് ചെയ്യാം. ഇത് ഫോണ്‍ ചൂട് കുറയ്ക്കാന്‍ മാത്രമല്ല ബാറ്ററി ലാഭിക്കാനും സഹായിക്കും.
ഓട്ടോ-അപ്ഡേറ്റും സിങ്കും പരിശോധിക്കാം
ആപ്പുകള്‍ സ്വയം അപ്ഡേറ്റ് ചെയ്യുന്നതും ഫോട്ടോകളും മറ്റ് ഡാറ്റകളും ക്ലൗഡിലേക്ക് സിങ്ക് ചെയ്യുന്നതും ഒരേസമയം നടന്നാല്‍ ഫോണില്‍ കൂടുതല്‍ പ്രവര്‍ത്തനം ഉണ്ടാകാം. പ്രത്യേകിച്ച് വലിയ ഫയലുകള്‍ അപ്ലോഡ് ചെയ്യുമ്പോഴോ നിരവധി ആപ്പുകള്‍ ഒരേസമയം അപ്ഡേറ്റ് ചെയ്യുമ്പോഴോ താല്‍ക്കാലികമായി ഫോണ്‍ ചൂടാകാം. അതുകൊണ്ട് ആവശ്യമില്ലാത്ത ഓട്ടോമാറ്റിക് സിങ്കുകളും പശ്ചാത്തല പ്രവര്‍ത്തനങ്ങളും നിയന്ത്രിക്കാം. എന്നാല്‍ സുരക്ഷയ്ക്കും സ്ഥിരതയ്ക്കും ആവശ്യമായ സിസ്റ്റം, സുരക്ഷാ അപ്ഡേറ്റുകള്‍ ഒഴിവാക്കുന്നത് നല്ലതല്ല.
ചാര്‍ജ് ചെയ്തുകൊണ്ടിരിക്കുമ്പോള്‍ ഫോണ്‍ ഉപയോഗം ഒഴിവാക്കുക
ഫോണ്‍ ചൂടാകാനുള്ള മറ്റൊരു സാധാരണ സാഹചര്യം ചാര്‍ജിങ്ങിനിടെ ഫോണ്‍ അമിതമായി ഉപയോഗിക്കുന്നതാണ്. ഫാസ്റ്റ് ചാര്‍ജിങ്, ഗെയിമിങ്, വീഡിയോ സ്ട്രീമിങ് തുടങ്ങിയവ ഒരുമിച്ച് നടക്കുമ്പോള്‍ ചൂട് കൂടാം. ഫോണ്‍ ചൂടായി തോന്നുന്നുണ്ടെങ്കില്‍ കുറച്ചുസമയം ഉപയോഗം നിര്‍ത്തി സ്വാഭാവികമായി തണുക്കാന്‍ അനുവദിക്കുന്നതാണ് നല്ലത്. ചൂടുള്ള ഫോണ്‍ തലയിണയ്ക്കടിയിലോ കട്ടിയുള്ള വസ്ത്രങ്ങള്‍ക്കിടയിലോ അടച്ച ബാഗിനുള്ളിലോ വെച്ച് ചാര്‍ജ് ചെയ്യുന്നതും ഒഴിവാക്കുക
എന്നിട്ടും ഫോണ്‍ വീണ്ടും അമിതമായി ചൂടാകുന്നുണ്ടെങ്കില്‍?
സെറ്റിംഗുകള്‍ മാറ്റിയിട്ടും ഫോണ്‍ ഉപയോഗമില്ലാത്ത സമയത്തുപോലും അമിതമായി ചൂടാകുകയോ, ബാറ്ററി വളരെ വേഗത്തില്‍ തീരുകയോ, ചാര്‍ജിങ്ങിനിടെ അസാധാരണമായി ചൂടാകുകയോ ചെയ്യുന്നുണ്ടെങ്കില്‍ കാരണമെന്തെന്ന് പരിശോധിക്കണം.
ബാറ്ററി പ്രശ്‌നം, തകരാറുള്ള ചാര്‍ജര്‍/കേബിള്‍, ഏതെങ്കിലും ആപ്പിന്റെ അസാധാരണ പ്രവര്‍ത്തനം തുടങ്ങിയവയും കാരണമാകാം. ഫോണ്‍ തുടര്‍ച്ചയായി അമിതമായി ചൂടാകുന്നുണ്ടെങ്കില്‍ അംഗീകൃത സര്‍വീസ് സെന്ററില്‍ പരിശോധിക്കുന്നത് സുരക്ഷിതമാണ്.