വൈദ്യുതി വാഹന ചാര്‍ജിങ് കൂടുകയും എസിയുടെ ഉപയോഗം വര്‍ധിക്കുകയും ചെയ്യുന്നതോടെ സംസ്ഥാനത്ത് രണ്ടു വര്‍ഷത്തിനുള്ളില്‍ വൈദ്യുതിയുടെ ആവശ്യം കുത്തനെ ഉയരുമെന്ന് റിപ്പോര്‍ട്ട്. പീക്ക് സമയത്തെ വൈദ്യുതി ആവശ്യകത 2024ല്‍ 5,302 മെഗാവാട്ട് ആയിരുന്നെങ്കില്‍ 2027 ആകുമ്പോള്‍ അത് 7,000 മെഗാവാട്ട് കവിയുമെന്നാണ് എനര്‍ജി മാനേജ്‌മെന്റ് സെന്ററിന്റെ (ഇഎംസി) പഠന റിപ്പോര്‍ട്ട്. സംസ്ഥാനത്തെ ഏറ്റവും ഉയര്‍ന്ന ആവശ്യകത ഇതുവരെ 5797 മെഗാവാട്ട് ആയിരുന്നു. പീക്ക് സമയത്തെ വൈദ്യുതി ആവശ്യകതയുടെ 60 ശതമാനത്തോളവും വൈദ്യുതി വാഹന ചാര്‍ജിങ്, എസി എന്നിവയ്ക്കായിരിക്കും എന്നാണ് റിപ്പോര്‍ട്ടില്‍ പറയുന്നത്. ഇലക്ട്രിക് വാഹനങ്ങളുടെ ഉപയോഗം വര്‍ധിക്കുന്ന സംസ്ഥാനങ്ങളില്‍ മുന്‍പന്തിയിലാണ് കേരളം ഉള്ളത്.
ഈ വെല്ലുവിളി നേരിടാന്‍ ബാറ്ററി എനര്‍ജി സ്റ്റോറേജ് സിസ്റ്റങ്ങള്‍ (ബാറ്ററിയിലെ വൈദ്യുതി സംഭരണം-BESS), പമ്പ്ഡ് സ്റ്റോറേജ് പ്രോജക്ടുകള്‍ (ജലം വീണ്ടും പമ്പ് ചെയ്ത് ഉപയോഗിക്കാവുന്ന ജലവൈദ്യുത പദ്ധതികള്‍-PSP) എന്നിവ വ്യാപകമായി വേണമെന്നാണു ശുപാര്‍ശ. ഊര്‍ജ സംഭരണ സംവിധാനങ്ങളുടെ സാധ്യത പ്രയോജനപ്പെടുത്താന്‍ നടത്തിയ പഠനത്തിന്റെ റിപ്പോര്‍ട്ട് അഡീഷനല്‍ ചീഫ് സെക്രട്ടറി കെ.ആര്‍.ജ്യോതിലാലിനു കൈമാറി. ഇപ്പോഴത്തെ പീക്ക് ഡിമാന്‍ഡ് അനുസരിച്ച് 7 ജിഗാവാട്ടില്‍ കൂടുതല്‍ ഊര്‍ജ സംഭരണ ശേഷി സംസ്ഥാനത്തു വേണം. നിലവിലെ വൈദ്യുതി സംഭരണ സംവിധാനങ്ങളില്‍ സൗരോര്‍ജം ഉപയോഗിക്കുന്നത് ചെലവ് കുറയ്ക്കുമെന്നും റിപ്പോര്‍ട്ടില്‍ പറയുന്നു.
2024 മാര്‍ച്ചിലെ കണക്കനുസരിച്ച് സംസ്ഥാനത്തിന്റെ ആകെ വൈദ്യുതി ഉല്‍പാദനം 6,669 മെഗാവാട്ടാണ്. ഇതില്‍ 46 ശതമാനം തെര്‍മല്‍ പദ്ധതികളില്‍ നിന്നും 28 ശതമാനം ജലവൈദ്യുത പദ്ധതികളില്‍ നിന്നും 5 ശതമാനം ആണവോര്‍ജത്തില്‍നിന്നുമാണ്. ബാക്കി 20 ശതമാനം സോളര്‍, കാറ്റ്, ചെറുകിട ജലപദ്ധതികള്‍, പുനരുപയുക്ത ഊര്‍ജസ്രോതസുകള്‍ എന്നിവയില്‍നിന്നുമാണ്. 2019 മുതല്‍ 2023 വരെ സംസ്ഥാനം ആവശ്യമുള്ള വൈദ്യുതിയുടെ 30 ശതമാനമാണ് സ്വന്തമായി ഉല്‍പാദിപ്പിച്ചിരുന്നത്. എന്നാല്‍ 2024 സാമ്പത്തിക വര്‍ഷത്തില്‍ ഇത് 18 ശതമാനമായി കുറഞ്ഞു. ജലവൈദ്യുത പദ്ധതി വഴിയുള്ള ഉല്‍പാദനത്തില്‍ 34 ശതമാനം ഇടിവു വന്നതാണ് ഇതിനു കാരണമായത്.
സംസ്ഥാനത്തിന്റെ ആവശ്യത്തിന്റെ 18 ശതമാനം കെഎസ്ഇബി ഉല്‍പാദനത്തിലൂടെ ലഭ്യമാക്കിയപ്പോള്‍ 82 ശതമാനവും പുറത്തുനിന്നു വാങ്ങുകയായിരുന്നു. പീക്ക് സമയത്തെ വൈദ്യുതി ആവശ്യകത 2019ല്‍ 4,242 മെഗാവാട്ട് ആയിരുന്നത് 2024 ആയപ്പോള്‍ 5,302 മെഗാവാട്ട് ആയാണ് വര്‍ധിച്ചിരിക്കുന്നത്. 2024ലെ സംസ്ഥാനത്തെ ആകെ വൈദ്യുത ഉപഭോഗം 27,600 എംയു (മില്യൻ യൂണിറ്റ്) ആയിരുന്നു. ഗാര്‍ഹിക മേഖലയിലെ ഉപഭോഗമാണ് ഇതില്‍ ഏറെയും. 2019 മുതല്‍ 23 വരെ വൈദ്യുതിയുടെ ആവശ്യകതയില്‍ വലിയ വര്‍ധന ഉണ്ടായിരുന്നില്ലെങ്കില്‍ 2024ല്‍ 10.7 ശതമാനമാണ് കൂടിയത്. ഗാര്‍ഹിക ഉപയോഗം 11 ശതമാനം വര്‍ധിച്ച് 13,735 എംയുവില്‍ എത്തി. പീക്ക് സമയത്തെ വൈദ്യുതി ആവശ്യകത ഏറ്റവും വര്‍ധിക്കുന്നത് വൈകിട്ട് 7 മുതല്‍ രാത്രി 11 വരെയാണെന്നും റിപ്പോര്‍ട്ടില്‍ പറയുന്നു.
പുനരുപയോഗ ഊർജ വിന്യാസത്തിലും ഇലക്ട്രിക് വാഹന സ്വീകാര്യതയിലും കേരളം അതിവേഗ വളര്‍ച്ച കൈവരിക്കുന്നതിനാല്‍, പീക്ക് സമയത്തെ വൈദ്യുതി ആവശ്യകത ഗണ്യമായി വര്‍ധിച്ചതായി പഠനം വ്യക്തമാക്കുന്നു. ശരിയായ സംഭരണ സാങ്കേതികവിദ്യ തിരഞ്ഞെടുക്കല്‍, സംഭരണ സംവിധാനങ്ങള്‍ രൂപകല്‍പ്പന ചെയ്യല്‍ എന്നിവ പ്രോത്സാഹിപ്പിക്കുന്നതിനായി നൂതനമായ നയങ്ങള്‍ സംരംഭങ്ങള്‍ എന്നിവ അനിവാര്യമാണെന്നും ശുപാര്‍ശയുണ്ട്. കേരളത്തിന്റെ ഊര്‍ജ മേഖലയില്‍ അടിസ്ഥാന സൗകര്യങ്ങള്‍ ശക്തിപ്പെടുത്തുന്നതിനും ഇന്ത്യയിലെ ഊര്‍ജ സംഭരണ പരിഹാരങ്ങളില്‍ സംസ്ഥാനത്തെ മാതൃകയാക്കി മാറ്റുന്നതിനുള്ള ഭാവി പ്രവര്‍ത്തനങ്ങള്‍ ആസൂത്രണം ചെയ്യുന്നതിനുമാണ് എനര്‍ജി മാനേജ്‌മെന്റ് സെന്ററിന്റെ നേതൃത്വത്തില്‍ പഠനം നടത്തിയത്.