അരുമകളെ ഓൺലൈനിൽ വാങ്ങുമ്പോൾ കുടുങ്ങല്ലേ

സോഷ്യൽ മീഡിയയിൽ വമ്പൻ ഓഫർ നൽകികൊണ്ട് പെറ്റ് വിപണിയിൽ തട്ടിപ്പ് പെരുകുകയാണ്. പെറ്റ് ഷോപ്പുകളെ അപേക്ഷിച്ച് 300 മുതൽ 1000 രൂപ വരെ വിലക്കിഴിവിട്ടാണ് സാമൂഹിക മാധ്യമങ്ങളിലെ കച്ചവടമെന്നത് തട്ടിപ്പിന് ഏറെ അനുകൂല സാഹചര്യമൊരുക്കുന്നു.

ലാഭത്തിൽ മയങ്ങി വളർത്തുമൃഗങ്ങളെയും പക്ഷികളെയും വാങ്ങാൻ ഇറങ്ങിപ്പുറപ്പെടുന്നവരാണ് തട്ടിപ്പ് സംഘങ്ങളുടെ കെണിയിൽ വീഴുന്നത്. അഡോപ്ഷൻ പോസ്റ്റുകളും നിരവധിയാണ്. അഡോപ്ഷനടക്കം നിരവധി ഗ്രൂപ്പുകൾ നിലവിൽ സജീവമാണ്. കൊവിഡ് കാലത്തിനു ശേഷം അരുമ മൃഗ, പക്ഷി വിപണിയിൽ കുതിച്ചുചാട്ടമാണുണ്ടായത്. വീട്ടിൽ വളർത്തുന്ന പക്ഷികൾക്കും മൃഗങ്ങൾക്കുമുള്ള ആവശ്യക്കാരേറിയതാണ് കാരണം. എന്നാൽ ഈ സാഹചര്യം തട്ടിപ്പുകാർ മുതലെടുത്തു. ഫെയ്സ്ബുക്ക്, വാട്‌സ്ആപ്പ് കൂട്ടായ്മകൾ കേന്ദ്രീകരിച്ചാണ് തട്ടിപ്പ്. കേരളത്തിന് അകത്തും പുറത്തുമുള്ള സംഘങ്ങളാണ് തട്ടിപ്പിന് പിന്നിൽ. നിരവധിപേരാണ് അടുത്തിടെ മാത്രം ഇത്തരം സംഘങ്ങളുടെ കെണിയിൽ വീണത്.