സ്കൂളുകളിലും ആശുപത്രികളിലും ഉള്പ്പെടെ ബലഹീനമായതും പൊളിച്ചുമാറ്റേണ്ടതുമായ കെട്ടിടങ്ങള് ഉണ്ടെങ്കില് അവയുടെ വിവരം രണ്ടാഴ്ചയ്ക്കകം നൽകണമെന്ന് മുഖ്യമന്ത്രി പിണറായി വിജയൻ ദുരന്ത നിവാരണ വകുപ്പിനോടു നിർദേശിച്ചു. ഇതുമായി ബന്ധപ്പെട്ടു ചേർന്ന ഉന്നതതല യോഗത്തിൽ സംസാരിക്കുകയായിരുന്നു മുഖ്യമന്ത്രി.
പൊളിച്ചു മാറ്റേണ്ടവ, അറ്റകുറ്റപ്പണി വേണ്ടവ എന്നിവ വേർതിരിച്ചു നൽകണം. അവധി ദിവസങ്ങള്ക്കു മുന്ഗണന നല്കി വേണം സ്കൂള് കെട്ടിടങ്ങള് പൊളിക്കാന്. പൊളിച്ചുമാറ്റിയ സ്കൂള് കെടിടങ്ങള് പണിയുംവരെ ക്ലാസുകള് നടത്താന് തദ്ദേശ സ്വയംഭരണ സ്ഥാപനങ്ങളും പിടിഎയും വിദ്യാഭ്യാസ വകുപ്പും പകരം സംവിധാനം കണ്ടെത്തണം. അണ് എയ്ഡഡ് സ്കൂള് കെട്ടിടങ്ങളുടെയും സുരക്ഷാ പരിശോധന ഇതോടൊപ്പം നടത്താന് മുഖ്യമന്ത്രി നിര്ദേശിച്ചു.
അപകടാവസ്ഥയിലുള്ള പൊതുകെട്ടിടങ്ങളുടെ വിശദാംശങ്ങള് രേഖപ്പെടുത്താന് സോഫ്റ്റ്വെയര് ഉണ്ടാക്കും. ഇലക്ട്രിക് കാര്യങ്ങള് പരിശോധിക്കാന് ചീഫ് ഇലക്ട്രിക്കല് ഓഫിസര്, തദ്ദേശ സ്വയംഭരണം, പൊതുമരാമത്ത് വകുപ്പ് ഇലക്ട്രിക്കല് എൻജിനീയർമാർ ചേര്ന്ന പരിശോധനാ സംവിധാനം ഏര്പ്പെടുത്തണമെന്നും മുഖ്യമന്ത്രി വ്യക്തമാക്കി.