നിലവിലെ ചെസ് ലോക ചാമ്പ്യനായ ചൈനയുടെ ഡിങ് ലിറനെതിരേ വിജയിച്ച് ഇന്ത്യയുടെ ഗ്രാൻഡ്‌മാസ്റ്റർ ആർ. പ്രജ്ഞാനന്ദ. നെതർലൻഡ്‌സിൽ നടന്ന ടാറ്റ സ്റ്റീൽ മാസ്‌റ്റേഴ്‌സ് ടൂർണമെൻ്റിൽ ചൊവ്വാഴ്‌ചയായിരുന്നു ലോക ചാമ്പ്യനുമേലെ ഇന്ത്യൻ താരത്തിൻ്റെ ആധിപത്യം കണ്ടത്. ഇതോടെ വിശ്വനാഥൻ ആനന്ദിനെ മറികടന്ന് ഇന്ത്യയിലെ ചെസ് റാങ്കിങ്ങിൽ ഒന്നാം സ്ഥാനത്തെത്താനും പ്രജ്ഞാനന്ദയ്ക്കായി.
2024-ലെ ആദ്യ അന്താരാഷ്ട്ര ചെസ് ടൂർണമെന്റ്റാണിത്. പ്രജ്ഞാനന്ദയുടെ ചെസ് മാന്ത്രികതയ്ക്കു മുന്നിൽ ലിറൻ്റെ പരിചയ സമ്പന്നത വിലപ്പോയില്ല. ഒരു ഘട്ടത്തിൽ പ്രജ്ഞാനന്ദ കളിയിൽ പെട്ടെന്ന് ആധിപത്യം ചെലുത്തിയെന്ന് തോന്നിപ്പിച്ചിരുന്നു. എന്നാൽ ശക്തമായ പ്രതിരോധ നീക്കങ്ങളിലൂടെ ലിറൻ അതിനെ പ്രതിരോധിച്ചു. അവസാനം പക്ഷേ, പ്രജ്ഞനന്ദയ്ക്കു മുന്നിൽ തോൽവി സമ്മതിക്കേണ്ടിവന്നു.
കഴിഞ്ഞ വർഷവും ഇരുവരും ഒന്നിച്ചുവന്നപ്പോൾ നാലാം റൗണ്ടിൽ പ്രജ്ഞാനന്ദയ്ക്കായിരുന്നു വിജയം. ഇതോടെ വിശ്വനാഥൻ ആനന്ദിനുശേഷം നിലവിലെ ലോകചാമ്പ്യനെ തോൽപ്പിക്കുന്ന രണ്ടാമത്തെ ഇന്ത്യൻ താരമാവാനും പ്രജ്ഞാനന്ദയ്ക്ക് കഴിഞ്ഞു. 2748.3 ഫിഡെ ചെസ് റേറ്റിങ്ങാണ് നിലവിൽ പ്രജ്ഞാനന്ദയ്ക്കുള്ളത്. വിശ്വനാഥൻ ആനന്ദിന് 2748. ഇതോടെ ആനന്ദിനെ മറികടന്ന് ഇന്ത്യയിൽ ഒന്നാമതെത്താനും പ്രജ്ഞാനന്ദയ്ക്കായി. 2780 ആണ് ഡിങ് ലിറന്റെ റേറ്റിങ്.