കുട്ടികളിലെ ചുമയുടെ ചികിത്സയും ചുമമരുന്നുകളുടെ ഉപയോഗവും സംബന്ധിച്ച് ആരോഗ്യ വകുപ്പ് ടെക്നിക്കൽ ഗൈഡ്ലൈൻ പുറത്തിറക്കി. കേരളത്തിന് പുറത്തു ചുമമരുന്ന് കഴിച്ചതിനെ തുടർന്ന് നിരവധി കുട്ടികൾ മരണമടഞ്ഞുവെന്ന റിപ്പോർട്ടുകളെ തുടർന്ന് ഇതുസംബന്ധിച്ച പഠനത്തിനായി മൂന്നംഗ വിദഗ്ധ സമിതിയെ നിയോഗിച്ചിരുന്നു. ഈ സമിതിയുടെ റിപ്പോർട്ട് ഉൾക്കൊള്ളിച്ചാണ് സംസ്ഥാനത്തിന് പ്രത്യേകമായി ഗൈഡ്ലൈൻ പുറത്തിറക്കിയത്.
ചികിത്സിക്കുന്ന ഡോക്ടർമാർ, ആരോഗ്യപ്രവർത്തകർ, ഫാർമസിസ്റ്റുകൾ, പൊതുജനങ്ങൾ എന്നിവർക്കായുള്ള സമഗ്ര മാർഗ്ഗരേഖയാണ് പുറത്തിറക്കിയതെന്ന് ആരോഗ്യമന്ത്രി വ്യക്തമാക്കി. എല്ലാവരും ഈ മാർഗ്ഗനിർദ്ദേശങ്ങൾ കൃത്യമായി പാലിക്കണമെന്നും മന്ത്രി നിർദ്ദേശിച്ചു.
ചുമയുടെ ക്ലിനിക്കൽ സമീപനവും മാനേജ്മെന്റും, പലതരം ചുമകളും രോഗ ലക്ഷണങ്ങളും, വിട്ടുമാറാത്ത, തുടർച്ചയായുള്ള ചുമയ്ക്കുള്ള സമീപനം, ചുമയുള്ള കുട്ടിയുടെ ക്ലിനിക്കൽ പരിശോധന, ചുമയുമായി എത്തുന്ന കുട്ടികൾക്കുള്ള പരിശോധന, കുട്ടികളിലെ ചുമയുടെ നിയന്ത്രണം, കുട്ടികളിലെ ചുമ ചികിത്സിക്കുമ്പോൾ പാലിക്കേണ്ട മാർഗ്ഗനിർദ്ദേശങ്ങൾ, ഔഷധേതര പ്രാഥമിക നടപടികൾ, ഡോസേജും സുരക്ഷാ പരിഗണനകളും, കേരള ഡ്രഗ്സ് കൺട്രോളർ പുറപ്പെടുവിച്ച സർക്കുലർ വഴിയുള്ള പ്രധാന നിർദ്ദേശങ്ങൾ, ഫാർമസിസ്റ്റുകൾക്കുള്ള നിർദ്ദേശങ്ങൾ, പൊതുജനങ്ങൾക്കുള്ള നിർദ്ദേശങ്ങൾ എന്നിവയാണ് ടെക്നിക്കൽ ഗൈഡ് ലൈനിൽ ഉൾക്കൊള്ളിച്ചിരിക്കുന്നത്.
മാതാപിതാക്കളും പരിചരിക്കുന്നവരും കുട്ടികൾക്ക് സ്വയം ചികിത്സ നിശ്ചയിക്കരുത്. ഓരോ കുഞ്ഞിൻ്റെയും പ്രായവും തൂക്കവും പരിഗണിച്ചാണ് ഡോക്ടർമാർ മരുന്ന് നിർദേശിക്കുന്നത്. അംഗീകൃത ഡോക്ടറുടെ കുറിപ്പടികൾ പ്രകാരമുള്ള മരുന്നുകൾ യോഗ്യതയുള്ള ഒരു ആരോഗ്യസംരക്ഷണ ദാതാവിന്റെ മേൽനോട്ടത്തിലായിരിക്കണം നൽകേണ്ടത്. ഡോസേജ് ഒരിക്കലും കൂടരുത്.
ചില മരുന്നുകളുടെ അനുചിതമായ ഉപയോഗം ഗുരുതരമായ ആരോഗ്യപ്രശ്നങ്ങൾക്ക് കാരണമാകാൻ സാധ്യതയുള്ളതിനാൽ പ്രത്യേകം ശ്രദ്ധിക്കണം. ആരോഗ്യകേന്ദ്രങ്ങളിൽ വിതരണം ചെയ്യുന്ന എല്ലാ കഫ് സിറപ്പ് ഉൽപ്പന്നങ്ങളും ശരിയായ നിർമ്മാണ മാനദണ്ഡങ്ങൾ പാലിച്ചതും ഡൈഎത്തിലീൻ ഗ്ലൈക്കോൾ (DEG), എഥിലീൻ ഗ്ലൈക്കോൾ (EG) പോലുള്ള ദോഷകരമായ മാലിന്യങ്ങൾ ഇല്ലാത്തതുമായിരിക്കണം.
രണ്ട് വയസ്സിന് താഴെയുള്ള കുട്ടികൾക്ക് കഫ് സിറപ്പ് നൽകാൻ പാടില്ല. അത്യാവശ്യം ഉള്ളപ്പോൾ മാത്രമേ പ്രത്യേകം ക്ലിനിക്കൽ വിലയിരുത്തലിന് ശേഷം നൽകാവൂ. രണ്ട് വയസിന് മുകളിൽ അഞ്ചു വയസുവരെ പൊതുവെ കഫ് സിറപ്പ് നൽകുന്നത് ഒഴിവാക്കുന്നതാണ് ഉചിതം. ആവശ്യമായ പക്ഷം പ്രത്യേക നിരീക്ഷണത്തോടെയാണ് നൽകേണ്ടത്. അഞ്ചു വയസ്സിന് മുകളിലുള്ള കുട്ടികൾക്കും ക്ലിനിക്കൽ വിലയിരുത്തലിന് ശേഷം മാത്രം ചെറിയ കാലയളവിൽ, ചെറിയ ഡോസിൽ നൽകുക.
ഡ്രഗ്സ് കൺട്രോളറുടെ നിർദ്ദേശങ്ങൾ ഫാർമസിസ്റ്റുകൾ കൃത്യമായി പാലിക്കണം. കുട്ടികൾക്ക് മരുന്ന് നൽകുമ്പോൾ പ്രത്യേക ശ്രദ്ധ ആവശ്യമാണ്. മരുന്നിൻ്റെ കാലാവധി തീർന്നിട്ടില്ലെന്ന് ഉറപ്പാക്കണം. ഗുണനിലവാര സർട്ടിഫിക്കറ്റ് ലഭിച്ച നിർമ്മാതാക്കളിൽ നിന്നുള്ള മരുന്നുകൾ മാത്രമേ നൽകാവൂ എന്നും ഉറപ്പാക്കണം.
പൊതുജനങ്ങൾക്കുള്ള നിർദേശങ്ങൾ
- ചുമ ഒരു രോഗമല്ല, ഒരു ലക്ഷണമാണ്, അതിനാൽ സ്വയം മരുന്ന് കഴിക്കരുത്.
- ചുമ സിറപ്പുകളോ ഫോർമുലേഷനുകളോ ആവശ്യപ്പെടരുത്. ശിശുരോഗവിദഗ്ദ്ധന്റെ നിർദ്ദേശങ്ങൾക്കനുസൃതമായി മാത്രം അവ ഉപയോഗിക്കുക.
- ബാക്കി വരുന്ന മരുന്നുകളും കാലഹരണപ്പെട്ട കുറിപ്പടികളും ഉപയോഗിക്കരുത്.
- ഒരു കുട്ടിക്ക് നിർദ്ദേശിക്കുന്ന മരുന്ന് ശിശുരോഗ വിദഗ്ദ്ധനെ സമീപിക്കാതെ മറ്റൊരു കുട്ടിക്ക് കൊടുക്കരുത്.
- ചുമയുള്ള കുട്ടികളിൽ, നെഞ്ചുവേദന, ശ്വാസതടസ്സം, ചുമയ്ക്കുമ്പോൾ രക്തം വരിക, അമിതമായ ക്ഷീണം, അപസ്മാരം, സയനോസിസ് അല്ലെങ്കിൽ സെൻസോറിയത്തിൽ മാറ്റം വന്നാൽ, ഉടൻ തന്നെ ഒരു ശിശുരോഗവിദഗ്ദ്ധനെ ബന്ധപ്പെടുക.
- ഡോക്ടർ നിർദ്ദേശിക്കുന്ന മരുന്നുകൾ നിർദ്ദിഷ്ട കാലയളവിൽ നിർദ്ദിഷ്ട അളവിൽ മാത്രം ഉപയോഗിക്കണം.