വൈക്കത്ത് നിന്ന് വേളാങ്കണ്ണിയിലേക്കും ചെന്നൈയിലേക്കും പുതുതായി തമിഴ്നാട് ട്രാൻസ്പോർട്ട് കോർപ്പറേഷൻ ആരംഭിക്കുന്ന ബസ് സർവീസുകൾ ജനുവരി ഒന്നിന് ആരംഭിക്കുമെന്ന് ഫ്രാൻസിസ് ജോർജ് എം.പി.അറിയിച്ചു. രണ്ട് ബസ്സുകളുടെയും റൂട്ടും സമയവും നിരക്കും പ്രഖ്യാപിച്ചു. ഇരു റൂട്ടുകളിലും അൾട്രാ ഡീലക്‌സ് ബസ് ആണ് സർവീസ് നടത്തുക. വൈക്കത്ത് നിന്ന് ചെന്നൈയിലേക്ക് 810 രൂപയും വേളാങ്കണ്ണിയിലേക്ക് 715 രൂപയും ആണ് നിരക്ക്. വൈക്കം- ചെന്നൈ 697 കിലോമീറ്ററും വൈക്കം – വേളാങ്കണ്ണി 612 കിലോമീറ്ററും ആണ് ദൂരം.
വൈക്കത്ത് നിന്ന് വൈകുന്നേരം 3.30-ന് പുറപ്പെടുന്ന ബസ് കോട്ടയം, കുമളി, തേനി, ഡിൻഡിഗൽ, ട്രിച്ചി വഴി രാവിലെ 8 മണിക്ക് ചെന്നൈയിൽ എത്തിച്ചേരും.
ചെന്നൈയിൽ നിന്ന് വൈകുന്നേരം 4 മണിക്ക് പുറപ്പെടുന്ന ബസ് രാവിലെ 8.30 ന് വൈക്കത്ത് എത്തിച്ചേരുമെന്നും ഫ്രാൻസിസ് ജോർജ് എം.പി പറഞ്ഞു. തമിഴ്നാട് ട്രാൻസ്പോർട്ട് കോർപ്പറേഷന്റെ ചെന്നൈ ഡിപ്പോയിലെ ബസ് ആണ് സർവ്വീസ് നടത്തുന്നത്.
വൈക്കത്ത് നിന്ന് വൈകുന്നേരം നാലിന് പുറപ്പെടുന്ന ബസ് കോട്ടയം, തെങ്കാശി, മധുര, തഞ്ചാവൂർ വഴി രാവിലെ 7.45 -ന് വേളാങ്കണ്ണിയിൽ എത്തിച്ചേരും.
വേളാങ്കണ്ണിയിൽ നിന്ന് വൈകുന്നേരം 4.30- ന് പുറപ്പെടുന്ന ബസ് രാവിലെ 8.15 ന് വൈക്കത്ത് എത്തിച്ചേരുമെന്നും ഫ്രാൻസിസ് ജോർജ് എം. പി പറഞ്ഞു.
തമിഴ്നാട് ട്രാൻസ് പോർട്ട് കോർപ്പറേഷന്റെ നാഗപട്ടണം ഡിപ്പോയിലെ രണ്ട് ബസുകൾ വീതം ആണ് വേളാങ്കണ്ണിയിൽ നിന്നും വൈക്കത്തേക്കും തിരിച്ചും സർവ്വീസ് നടത്തുന്നതിന് ക്രമീകരിച്ചിരിക്കുന്നതെന്ന് അദ്ദേഹം കൂട്ടിച്ചേർത്തു.